Елордада ерекше білім беру қажеттіліктері бар балаларға арналған инклюзивті білім беру кеңістігі жыл сайын кеңейіп келеді. Қазіргі таңда Астана қаласында 4 психологиялық-педагогикалық түзету кабинеті, 2 оңалту орталығы және аутизм спектріндегі балаларды қолдау мақсатында 2 арнайы орталық жұмыс істейді, деп Urbanexpert.kz елорда әкімдігінің ресми сайтына сілтеме жасап, хабарлайды.
Жыл сайын бұл мекемелерде 4 000-нан астам бала кешенді түзету көмегін алады.
Инклюзивті бағыттағы жұмысты одан әрі күшейту мақсатында 2025 жылдың сәуір айында елордада №5 психологиялық-педагогикалық түзету орталығы өз жұмысын бастады. Бұл орталық 0 жастан 18 жасқа дейінгі ерекше білім беру қажеттіліктері бар балаларға арналған. Атап айтқанда, мектепке дейінгі ұйымдарға бармайтын, арнайы немесе жалпы біліммен қамтылмаған балаларға жан-жақты көмек көрсетіледі.
№5 орталық психологиялық-медициналық-педагогикалық консультация (ПМПК) қорытындысы негізінде келесі санаттағы балалармен жұмыс жүргізеді:
- көру және есту қабілеті бұзылған;
- сөйлеу қабілеті дамымаған немесе тежелген;
- тірек-қимыл жүйесінде ақауы бар;
- психикалық дамуы кешеуілдеген;
- ақыл-ойында ауытқуы бар;
- мінез-құлқы мен эмоциялық-еріктік салада қиындықтары бар балалар.
Оқи отырыңыз: Алматыда мерзімі өткен дәрі - дәрмектерді қабылдау пункттері ашылды
