Астана әкімі Женис Касымбек қалалық LRT жобасының тестілік кезеңімен танысты

Фото: Астана қаласы әкімдігінің баспасөз қызметі

Астана әкімі Женис Касымбек елордадағы жеңіл рельсті көлік жүйесінің тестілік қолданылу барысымен танысты.

Қала басшысының айтуынша, Astana LRT жобасы аясында қазіргі уақытта жүйенің негізгі жұмыс параметрлері кешенді түрде тексерілуде. Атап айтқанда, пойыздардың қозғалыс кестесі, техникалық сенімділігі, қауіпсіздік жүйелері, сондай-ақ басқару орталығының тиімділігі сыналуда.

Сонымен қатар, инфрақұрылымның дайындығына ерекше назар аударылуда. Станциялар, жол желісі, электрмен жабдықтау жүйелері және жолаушыларға қызмет көрсету элементтері кезең-кезеңімен тексеріліп жатыр.

Әкімнің сөзінше, тестілеу кезеңі жобаны толық іске қоспас бұрын барлық ықтимал тәуекелдерді азайтуға және жүйенің тұрақты жұмысын қамтамасыз етуге бағытталған.

Сарапшылардың пікірінше, LRT іске қосылғаннан кейін елордадағы көлік жүктемесі азайып, қоғамдық көлік жүйесінің тиімділігі арта түседі. Бұл өз кезегінде қала тұрғындары мен қонақтарының қозғалысын жылдам әрі ыңғайлы етуге мүмкіндік береді.