фото/Акимат
Республика күні қарсаңында Астанадағы Мемлекеттік рәміздер алаңында ауқымды флешмоб өтті: елордалық мектептердің 1500-ден астам оқушысы «Атамекен» әнін орындады. Шара «Адал азамат» бірыңғай тәрбиелік бағдарламасының бір бөлігі ретінде ұйымдастырылды, деп хабарлайды Urbanexpert.kz елорда әкімдігіне сілтеме жасап.
Ән шырқалған сәтте қатысушылар бес қатарға тізіліп, ашық алақан бейнесін қалыптастырды. Бұл бейне жас ұрпақтың бірлігі мен ашықтығының, достық пен өзара қолдаудың нышанына айналды.
Айта кетейік, 25 қазан — Қазақстанда Республика күні аталып өтеді. Мереке аясында Астанада шамамен 150-ге жуық іс-шара жоспарланған: концерттер, көрмелер, спорттық жарыстар мен білім беру кездесулері ел бірлігі мен мақтанышын дәріптеу идеясын біріктіреді.
